بچوں کے لنچ باکس میں کیسی غذائیں رکھنی چاہئیں؟ والدین متوجہ

بچوں کی ذہنی وجسمانی نشونما کے لیے ہر چند گھنٹوں بعد بہترین خوراک کا انتخاب بہت ضروری ہے، والدین اس بات کا خیال رکھ کر بچوں کی صحت بہتر بنا سکتے ہیں۔

اسی طرح ناصرف گھر میں بچوں کے کھانوں پر خصوصی توجہ ہونی چاہیے بلکہ اسکول جاتے بچوں کے لیے لنچ باکس میں اچھی غذاؤں کا ہونا بھی ضروری ہے، عموماً اسکول میں فروخت ہونے والی اشیاؤں کی طرف بچے زیادہ راغب ہوتے ہیں، والدین کو اس جانب بھی دھیان دینا ہوگا۔

ایک طبی رپورٹ کے مطابق بچے اپنی روزانہ کی کیلوریز کا 35 سے 40 فیصد اسکول کے وقت میں کھاتے ہیں اس دوران یہ دیکھنا لازمی ہے کیلوریز صحت مند ہیں یا نہیں ہیں۔

والدین اسکولوں کی انتظامیہ کے ساتھ صرف بچوں کے امتحان میں نمبروں کے حوالے سے ہی رابطے میں نہ رہیں بلکہ یہ بھی معلوم کریں کہ بچے غیرمعیاری اشیا تو نہیں کھا رہے۔

بچوں کی صحت حساس ہوتی ہے اس لیے تھوڑی سی غلط چیز بھی مسائل باعث بن سکتی ہے خصوصاً ایک ایسے وقت میں جب ہر طرف وبا کا خوف پھیلا ہے۔

کھانے کا معیار

رپورٹ میں بتایا گیا کہ بچوں کے ٹفن یا لنچ باکس میں چیزیں کم میٹھی ہوں، کم چکنائی دودھ کی مصنوعات، پھل، سبزیاں، صحت مند نمکین اشیا جیسے خشک میوہ جات وغیرہ شامل ہوں۔

غور طلب باتیں

کلاس میں ہونے والی پارٹیوں میں میٹھی اشیا کی حوصلہ شکنی کی جائے، بچوں کو خوراک کی اہمیت سمجھائی جائے، اساتذہ بھی بچوں کی روزمرہ خوراک کے حوالے سے بات کریں۔ جنک، فاسٹ فوڈ یا میٹھی چیزیں کبھی کبھی ہی کھائی جائیں تو بہتر ہے، روزانہ ان کا استعمال صحت کو نقصان پہنچا سکتا ہے۔