بہت زیادہ خون بہنے کی صورت میں کیا کرنا چاہیئے؟

اکثر اوقات چوٹ لگنے یا کسی حادثے کے سبب جسم کے کسی حصے سے خون بہنا شروع ہوسکتا ہے جو اگر فوری طور پر نہ روکا جائے تو خطرناک ثابت ہوسکتا ہے۔

بہت زیادہ خون بہنے سے جسم میں خون کی کمی واقع ہوجاتی ہے اور اس کی مقدار بہت زیادہ ہو تو موت بھی واقع ہوسکتی ہے۔

ایسی صورت میں خون کو فوری طور پر روکنا بہت ضروری ہوتا ہے۔ اگر آپ کے ارد گرد ایسی صورتحال پیش آئے تو متاثرہ شخص کی مندرجہ ذیل طریقوں سے مدد کریں۔

زخم کو چھونے سے پہلے دستانے پہن لیں۔ خالی ہاتھ سے زخم کو مت چھوئیں۔

خون بہنے والی جگہ سے لباس ہٹا دیں، اس کے بعد کسی صاف کپڑے یا روئی سے زخم کو 10 منٹ تک دبائے رکھیں۔ زخم پر پٹی بھی باندھی جاسکتی ہے۔

پٹی کو بہت سخت مت باندھیں اور اسے ڈھیلا رکھیں۔ ایک پٹی باندھنے کے بعد بھی خون بہنا نہ رکے تو ایک اور پٹی باندھ دیں، اسپتال پہنچنے تک آپ پٹی کو تبدیل بھی کرسکتے ہیں۔

اگر خون بہت زیادہ بہہ رہا ہو تو مریض کا مشاہدہ کرتے رہیں، مریض کی نبض ہر 10 منٹ بعد چیک کرتے رہیں اور اگر سانس رکتی ہوئی محسوس ہو تو مصنوعی سانس دیں۔

خون کو روکنے والا آلہ جسے رگ میں لگایا جاتا ہے استعمال کرنے سے گریز کریں۔ اس آلے کا استعمال تجربے کار ڈاکٹر کی جانب سے کیا جانا ہی بہتر ہے۔

یاد رکھیں، ایسا حادثہ جس میں کسی شخص کا بہت زیادہ خون بہے، رونما ہوتے ہی ایمبولینس طلب کریں اور اسے اسپتال لے جائیں۔ مندرجہ بالا تمام طریقے عارضی ہیں اور ان پر اسپتال پہنچنے تک کے لیے عمل کریں۔

Comments

comments